Marco conceptual e situación do cambio climático
10. Conclusión
Cos datos dispoñibles ata a data, podemos dicir que actuar fronte ao cambio climático é un investimento rendible, xa que os danos esperados superarán os custos de mitigación. Por cada euro investido en actividades de mitigación poderíamos aforrar danos por valor de ata 5 euros segundo o IPCC (Cuarto Informe de Avaliación IE4) e de ata 20 euros, segundo o Informe Stern.
Un aspecto pouco mencionado é que a loita contra o cambio climático non só expón restricións, senón tamén oportunidades. A mitigación pode permitir a España reducir a súa dependencia dos combustibles fósiles e mellorar outros problemas ambientais como a contaminación atmosférica das cidades. É tamén unha boa oportunidade, por exemplo, para repensar a planificación do territorio, para canalizar as necesidades de mobilidade cara a modos de transporte máis limpos e para apostar polas novas tecnoloxías e a I+D+i.
Neste contexto, é certo que moitas empresas terán que asumir custos, pero tamén poderán obter beneficios e ser máis competitivas se son capaces de aforrar enerxía ou de desenvolver produtos baixos en carbono. O cambio climático tamén pode, por tanto, constituír unha oportunidade para mellorar non tanto o nivel como a calidade de vida.
Os custos de mitigación no longo prazo son difíciles de estimar, xa que existen grandes incertezas. O impacto sobre o PIB mundial vai ser función do escenario de redución das emisións e de cal sexa a concentración de gases de efecto invernadoiro na atmosfera. Segundo o Grupo Intergobernamental de Expertos sobre o Cambio Climático (IPCC), reducións de emisións coherentes cunhas concentracións na atmosfera de 445-535 ppm (partes por millón) en 2030 supoñerían unha diminución do PIB mundial inferior ao 3%, e manter estas mesmas concentracións en 2050 supoñería unha perda inferior ao 5,5%. Estas concentracións permitirían manter os incrementos de temperatura entre os 2 e 2,8 graos centígrados; aínda que a Comisión Europea na súa estratexia de cambio climático expón como obxectivo limitar os incrementos de temperatura por baixo dos dous graos centígrados.
Os impactos do cambio climático serán moi diversos a escala mundial.
Estímase que os incrementos de temperatura inferiores aos 2º C poderían xerar beneficios nalgunhas rexións e sectores acompañados de impactos negativos noutros moitos. Incrementos superiores a 2-3º C suporían perdas en case todos os lugares.
O Cuarto informe de Avaliación (IE4) estima que as perdas para un aumento de temperatura de 4 º C poderían situarse entre un 1 e un 5% do PIB, aínda que nalgúns países estas reducións poderían ser máis elevadas.
Nestes cálculos incluíronse as perdas derivadas da agricultura, o turismo, os desastres naturais ou os custos de construción de infraestruturas para a adaptación.
O mundialmente coñecido Informe Stern sinala que estes danos poderían ser maiores e alcanzar entre un 5% e un 20% do PIB mundial.
Enlace conclusións informe Stern:
