O cambio climático dará lugar a un abanico de efectos directos e indirectos que se verán acentuados pola súa interacción con outros motores do cambio global (alteracións en uso do chan, contaminación, intercambio biótico). A “ mediterraneización” do norte peninsular e a “aridización” do sur son algunhas das tendencias máis significativas. A biodiversidade española verase moi afectada e estará sometida a variacións nas súas condicións de tal magnitude, que moitas especies poden verse en risco de extinción, ao non poder desprazarse cara a zonas favorables para o seu desenvolvemento conforme o clima vaia cambiando. O perigo é tal que algúns traballos indican que en Europa poden verse afectados porcentaxes moi importantes (de ata a metade ou máis) das especies vexetais. Nalgúns grupos animais dos que hai información (réptiles, anfibios) o impacto pode ser mesmo maior (ata o 97% das especies poden verse afectadas). A conservación da biodiversidade será un reto, xa que o cambio climático move os cimentos das bases actuais da conservación.
Estudos realizados cun 10% da flora de Europa mostra que o hábitat potencial da maioría destas especies sofre un desprazamento cara ao Norte e en altitude. Na eventualidade de que as especies non se puidesen dispersar libremente, colonizando os novos hábitats potenciais, a maioría delas verían reducido o seu hábitat, e máis da metade poderían chegar a atoparse en situacións de vulnerabilidade, en perigo, críticamente en perigo ou abocadas á extinción.
Os ecosistemas terrestres veranse sometidos a un cambio nas súas condicións como non sufriron en milenios, sendo moi probable que moitos deles se vexan sensiblemente alterados na súa composición, estrutura, función e, con iso, nalgúns dos servizos que prestan. As zonas e sistemas máis vulnerables serán as illas e os ecosistemas illados (os ecosistemas de alta montaña, as illas ) así como as zonas de transición entre ecosistemas.
A natureza de moitos dos ecosistemas acuáticos continentais verase tamén modificada. Así, algúns deles pasarán de ser permanentes a estacionais e outros desaparecerán, e en todos os casos reducirase o seu tamaño e alterarase a súa composición e funcionamento. Os ecosistemas máis afectados serán os ambientes endorreicos, lagos, lagoas, ríos e arroios de alta montaña (1600-2500 m) e os ambientes dependentes das augas subterráneas. O ascenso do nivel do mar poñerá en perigo os humidais costeiros. No medio mariño, o aumento da temperatura da auga, así como os cambios na mestura destas debido, entre outros, aos cambios na circulación costeira farán que diminúa a produtividade, e que haxa cambios nas redes tróficas así como variacións na distribución das especies.
As posibilidades de adaptación dos ecosistemas son limitadas,así, por exemplo, nos ecosistemas leñosos terrestres haberá que diminuír o seu perigo, reducindo as cargas de combustible, para evitar incendios catastróficos. Nos ecosistemas herbáceos haberá que reducir a presión do gando. Nos ecosistemas acuáticos continentais habería que reducir as extraccións de auga, e limitar a contaminación das augas, e nos ecosistemas mariños habería que reducir a presión sobre os mesmos e aumentar as reservas.
Pódese afirmar que o cambio climático poderá alterar a estrutura e composición das comunidades nativas e como consecuencia, o funcionamento dos ecosistemas, actuando como un réxime de perturbación que acrecentará o risco de invasións biolóxicas. Se por unha banda algunhas especies exóticas e invasoras poderán sucumbir baixo os efectos do cambio climático, outras poderán volverse capaces de sobrevivir e colonizar zonas onde actualmente non poden sobrevivir debido ás limitacións impostas polo clima. Así mesmo, especies exóticas establecidas poderán volverse invasoras se o cambio climático incrementa a súa capacidade competitiva ou a súa taxa de propagación (supresión do tempo de latencia) mentres que outras xa invasoras poderán expandir a súa áreade distribución. Os efectos do cambio climático afectarán non só ao éxito das invasións trala introducción dunha especie, senón tamén a todas as etapas (vías de entrada, vectores, etc.) que conforman o proceso de invasión así como á eficacia dos métodos de xestión.
https://www.adaptecca.es/microsites/biodiversidad/